2007/02/27
اضحك على الحكومة الإلكترونية
ضحكة اليوم مع موقع وزارة التموين و التجارة الداخلية msht.tripod.com.¶
جهز بطاقة التموين في يدك قبل زيارة الموقع.¶
لاحظ:¶
- مسار الموقع
- الإعلانات، في رأس و ذيل الصفحة
حقيقي صعبانين عليّ. هيعملوا إيه في دولة فيها خمسة ملايين موظف حكومي و جهازها الإداري يدار بشكل غير رشيد (حتىٰ مع التغاضي عن الفساد) باعتباره سبوبة لتوظيف المواطنين و للتظاهر بدفع مرتبات لهم.
الغريب أن سبب عثوري علىٰ مثل هذه المواقع هو ذات السبب الذي دفعني إلىٰ العثور علىٰ مثيلاتها فيما مضىٰ، عدا ذلك فعدمها أفضل.
(12) تعليقات
الموضة و المسيحية و الربح السريع على موقع وزارة التموين.
عمرو غربية @ 22:19 2007/02/27
ويا سيدي لما تتيح ال pop-up حتبقى حاجة لطيفة خالص.
خدت بالك من دي؟ جميع حقوق النشر © محفوظة لوزارة التموين والتجارة الداخلية
أبو الليل @ 01:43 2007/02/28
فضايح !!!!
و الله يا ألِف فكرتني بموقع البنك الأهلي المصري، كنت دخلت عليه قريب عشان أعرف ايه الخدمات اللي بيقدموها أونلاين و زي ما تقول أقارن بينه و البنك اللي كنت فاتح حسابي فيه في كندا.. طبعاً الفارق كان مبكي.. سايت البنك الأهلي مليان بانرات فيها نصوص بتأثيرات و تحريك فيها رقم تليفون البنك و حاجات كده.. حاجة مؤسفة فعلاً يعني.
عارف إني حاقول كلام إنت أكيد عارفه و شفته قبل كده في سفرك.. بس الله يمسيكي بالخير يا كنكه.. الواحد كانت حياته كلها أونلاين.. بنوك.. استخراج و تمديدات فيزات.. حجز تذاكر طيران.. حجز سينما.. خرائط بأسماء الشوارع و أرقام البنايات و أماكن المحلات التجارية. مسارات الأتوبيسات و مواعيدها .. تخش موقع شركة المواصلات بتاعة المدينة و تقول لها انت عاوز تروح من فين لفين و هي تقول لك تركب من محطة كذا لكذا و بعدين تمشي كام متر لشارع كذا و تاخد من هناك أتوبيس نمرة كذا و يقترح لك مسارات و مواعيد الأتوبيسات مضبوطة بالدقيقة و الثانية.
في مصر لو عملنا سايت زي كده و حبيت تقول “أنا رايح المكان الفلاني.. أركب أنهي أتوبيس”.. حايرد عليك برسالة بتقول : “هو قالك فين بالضبط ؟ ”
أو غلى أفضل تقدير حايديك مسار مبدئي و بعدين يقول لك : “تنزل هناك و تسأل”.
أنا أصلاً لما باشوف أجانب واقفين في الشارع في مصر بخريطة باضحك.. شوف المنظر :
http://i6.photobucket.com/albums/y240/spockroyaltea2/jgmap.jpg
شريف نجيب @ 07:48 2007/02/28
تبرعوا لتسديد متأخرات استضافة موقع معرض القاهرة الدولييييييييي للكتاب وفتح الموقع.
حَمُكْشَة @ 13:57 2007/02/28
لا يا أبو الليل، أنا عندي ما يعصمني من البوب أبس، لكن متخيل فرح العمدة ال طلع لك.
لاحظت “حقوق الطبع محفوظة”. دائما أبحث عنها في مواقع الحكومة بالذات. لكن ما علقتش عليها لأني هافتح موضوع طويل.
توجد مواقع حكومية تكون حقوق طبع المحتوى فيها محفوظة للشركة ال عملت لهم الموقع! لكن بما أن الموقع دا شكله عامله موظف في قسم الحاسب الآلي ففلتوا المرة دا.
“هو قالك فين بالضبط ؟ ”
بالضبط كدا…هاهاها
أنا لما أشوف مصري في شارع في منطقة هو أول مرة يروحها أو عاوز يعرف يركب أي أتوبيس بيصعب عليّ.
موقع معرض الكتاب دا حكايته حكاية. دي جُرسة مقصودة من الشركة لأنه يظهر أن الهيئة العامة للكتاب تتعمد عدم الدفع و تحاول تمشية أمورها بالاستعباط.
ألِف @ 15:10 2007/02/28
أيوة يا عم، بس دا معناه برضو إن المتأخرات كتير قوي بشكل عامل عبأ ع الهيئة، ودا برضو يقول لك إن المناقصة رسيت بتكلفة غير مجدية على الشركة المطورة، عشان سبوبة لحد هنا وسبوبة لحد هنا غالبا. المشاريع والهيئات اللي فيها حكومة ورعاية ف مصر بتدفع ف موقع مئات أضعاف التكلفة الواقعية ليه وف الآخر نتجرس بالشكل دا قدام الأجانب اللي جم المعرض ضيوف لا مؤاخذة شرف.
حَمُكْشَة @ 11:06 2007/03/01
الحكومةحبت تخلى فى مواقعها حاجة مفيدة تخلى الناس تدخلها(المواقع طبعا مش الحكومة)، فبقت تقدم خدمات.يوم عيد الشرطة قعدوا يعيدوا ويزيدو فى”تدشين الموقع الاليكترونى لوزارة الداخلية” ، الحقيقة انى ما لقتش اى موقع!،كل الموضوع انه طريقة للاستفسار عن مخالفات المرورو بالانترنت-ودى قديمة – وطريقة لارسال الشكوى برضه عبر الانترنت
بص بقى الاستمارة بتاعة الشكوى عاملة ازاى
http://www.egypt.gov.eg/arabic/services/moi/moi1.asp
وده الكتالوج يافندم
http://www.egypt.gov.eg/arabic/services/moi/moi3.asp
pepa @ 11:51 2007/03/01
مشاريع مستقبلية
http://msht.tripod.com/aFrames2.htm
بحوث واستثمار
http://msht.tripod.com/aFrames2.htm
مختار العزيزي @ 16:14 2007/03/01
والله ميه اى حاجه فى مصر تعجب دلوقتى كلها بقت بطيخ او ذى ما بيقولو سمك لبن تمر هنددى
المفروس @ 20:42 2007/03/01
والله العظيم الناس دول كرهونا فعلا في البلد
بقى لي 25 سنة خارج مصر وكل سنة بنزل أجازة شهرين وفي كل أجازة أحس إني ببعد أكتر وأكتر بمشاعري وإحساسي عن البلد، الله يلعن اليوم اللي جاب نظام الثورات لبلدنا من 55 سنة والبلد من سيء لأسوأ.
sallohy @ 21:42 2007/03/01
عزيزى ألف
الوزارة نفسها تغيرت وبقت وزارة التضامن، والموقع ده احتمال يكون اجتهاد موظف نبيه حب ياخد ترقية فعمل للوزارة موقع على خدمة مجانية. بس الطريف فى القصة إن حتى الوزارة الجديدة اللى تولاها على مصيلحى رئيس هيئة البريد السابق وصديق الحكومة الالكترونية مالهاش موقع على الانترنت وكل معلومات موقع الحكومة الالكترونية عنها إنا وزارة جديدة. لا تبتسم الأمر يستحق الضحك حتى البكاء
شوف الرابط: http://www.egypt.gov.eg/arabic/guide/directory.asp?Gov=social&http://www.egypt.gov.eg/arabic/guide/directory.asp
ايهاب @ 20:59 2007/03/09
ماذا نقول في عصر أصبح فيه الفول له موقع رسمي
أيمن فخري @ 20:26 2007/09/09
عذرا، التعليقات مقفلة.